زمان كان في برنامج اسمو صور مقلوبة بيناقش الحاجات السالبة في مجتمعنا وبوريك وين المشكلة والمفروض انت تغيرها .
وقبل ما يجيني واحد يقول لى مجتمعنا مليان مشاكل وانا ما حا اقدر اغير المجتمع دا براي ، وأي زول اسي بيقول روحي ياروحي ، والعين بصيرة والايد قصيرة طيب انا معاك مع انو انا دا بعتبرو ضعف لكن نمشي بي كلامك ، طيب في محيطك الشخصي اللي انت واسرتك ديل ما لهم ما بتقدر تغير فيهم واسمح لى اذا كنت ما بتقدر تغير في نفسك واسرتك فانت انسان زايد على الدنيا وربنا يعينك اما اذا كان العكس واللي انا متاكد انو كلنا او معظمنا كدا ناس فاهمين وربنا مدينا العقل هو البورينا وين الصاح ووين الغلط اسمع مني :

حقيقي السبب الخلاني اكتب الموضوع دا انو في صور كثيرة مقلوبة في شخوصنا وفي اسرنا { من ناحية الفهم } عاوزة تغيير ومافي زول عندو عزر يقول ما بقدر وماعارف وماسمعت وتسد دي بي طين والثانية بي عجين وانا حا ابدا بي صورة جديدة ودخيلة علينا صورة مخجلة ومحزنة وتورينا كيف وصل بينا الحال من عدم احترام لي نفسنا ولى اخلاقنا وقيمنا السمحة الاتربينا عليها .

محمد عيدابى

يديك العافية اولا

و الله و انا بقرأ فى كلامك اتخيلت انك بتتكلم عن ناس تانيين غيرنا و خاصة تطورات مرحلة ما بعد الاسلو دانس ....و الادهى أن هذا الامر يتم كمان فى مجتمع لا يسمح بهذا النوع من الممارسات العلنية ....حتى لو حصلت فى السودان بتكون مستهجنة ...طول عمرنا و مجتمعنا بتحكمة حاجة غير متوفرة فى مجتمعات تانية الا و هى الحياء ....يمنعنا حياءنا حتى لدرجة تجفيف منابع الحب لدينا و حتى فى الخلوة الشرعية لا نقدر على البوح بما يجب ...فكيف انقلبت الصورة الى هذه ( البجاحة) و اصبحنا نقلد الغرب حتى فى تقاليد الزواج .....

فى اللحظة ديك ما كان فى واحد عندو بسطونة

فعلا دى صورة مقلوبة

محمد عيدابي صاحب الكي بورد الصريح ..

صباحك اوركيدة .

الصور المقلوبة كتيرة جدا و لكن بما ان الموضوع انحصر على ناحية الاعراس هنا فأنا احاول اكتب بيتين على قصيدتك .

الشيء المستغرب و يصل مرحلة الاستهجان ان الاعراس خارج السودان اصبحت سافرة " ان جاز لي التعبير " اكثر من داخله . و ما زالت الاعذار الواهية مستمرة , احنا اهل العروس و احنا ده بيتنا و الفي الحفلة ديل اهلي .... الخ من اعذار تحاك بخيط العنكبوت .


اما العروس ذات الثوب الناصل منظفا الارض و تاركا المجال للهواء بالعبور بمرونة من اعلى لأسفل فحدث عنها ولا حرج عليك .
موضة فستان العروس الناصل في تطور مستمر فاق تطورات مشاريعنا الحضارية في السودان و كأن العلاقة طردية بين موضة الانحلال و تقدم الزمن .

اعجب الموضات هو حركة السواق الجديدة هنا فالوالد المغترب اعتنق مهنة السواق ليوصل المدام و كتاكيتها الى مقر الحفلة بالزي الاسود رمز البلد و يغادر ليعود بعد ان يتلقى اي رنة من اي محمول ليس لأي قطعة قماش مما يرتدونه جيب ليضعه فيه .

عند دخول المدام و من تبعها باحسان تكون المحطة الاولى محطة الشماعة حيث تكشف العبايات عن ما كان شبه مستور تحتها . و مازال العذر بأننا كلنا نساء مستمرا " رغم زيادة الشوارب حتى زاد عن عدد مصلي الفجر في المسجد المهجور المجاور " .


اما شبابنا فهو الذي يدعنا نغض الطرف احيانا عن الكتاكيت . منظر واحدهم يدعك تقتنع تمام الاقتناع بأنك قد تأمن اختك في حضوره و قد يلتبس عليك الامر فتظنه اختك احيانا كثيرة .


تدور رحى الحرب " الحفلة سابقا " حتى يكتفي الكل من النظر و المغامزات و الملامزات و أخيرا تأتي الرنة للسواق راجل الحارة " يوما ما " ليأتي و يأخذ مدامه و كتاكيتها _ دون نسيان محطة ارتداء العباية _ لما في ذلك من احترام للمنظر العام خارج الحفلة , و لاقناع ذلك السواق بأننا ملتزمون بحدود التستر .



" فتح بلاغ "

نود الابلاغ عن رغبتنا في رسم حدود جديدة للستر حيث ان القديمة اصبحت لا تناسب المدام و كتاكيتها و العروس و ضيوف الحفلة .

انا منوجهة نظرى هم شايفين الحاجه دى بتعبر عن رقي الناس وانا متاكده انو كل الاعضاء فى المنتدى حيوافقوا. دى حاجات عاديه طبعا انا قصدى السلو ما اللبس الضيق الشفاف طبعا ده بيرجع للبت نفسها
وبث

الجعلية شرفتي كثير قلتي لي ال 14 ديل ياخي ديل اسي ما بيكملو العشاء براهم

ما الفنان لازم يكون معاهو حاشية وكدا

عيدابي ..

حقيقي موضوع مؤلم . وتدمع ليهو العين ... على قول اخوانا السبقوني في البوست .. الحكايه بقت متفشيه بي طريقه رهيبه .. والمشكله لا اب يوجه لا ام تتصرف عدل... كلهم شبه بعض .. والابناء حدث ولا حرج .. الاعراس السودانيه .. بقت عبارة عن اوكار للفساد ان جاز التعبير ... يعني الواحد من ما يسمع انو في عرس سوداني يتاكد تماما.. من الكميه المهوله من السكرانين .. والبنات العجيبات .. والغريبه كلهم من اسر معروفه .. واختلاط الحابل بالنابل ..

اما لو جينا للعريس والعروس ... ديل دنيا براهم .. العروس فرحانه بالفستان .. والطرحه .. وناسيه دينها وربها وحجابها .. يعني الواحدة قبل العرس تشوفها محترمه ولابسه كويس .. تجي يوم العرس تشوف العجب العجاب ..

اليك التاني ... فرحان ويرقص ويبشر ... ومخلي مرتو وام اولادو المستقبيله .. عرضه لي النهش .. ونظرات الدنيئن من المجتمع ..

بس دا كلو بيرجع للبيت وللتربيه .. والنشئه الصحيحه ..

وحمانا الله واياكم ..

عيدابي الرائع

انت بتتكلم عن فئات شاذه للأسف سمعت انها كترت في السودان...ذكرتني بزواج اختي قبل ست سنوات تقريبا لمى كان دخول الزواج للأهل فقط والمعزومين وكل زول بدعوته يعني مافي مرافقين شخصيين...اتعرضنا لأنتقادات شدييده من الاهل لكن في الاخير الواحد عاوز يفرح فرحته ويكون متظمن علىاهله

ثانيا للأسف بقت عاده السكر ده حتى بين اهلنا (الحلفاوين خصوصا ) شنيعه..كانوا بقت أساسيه من اساسيات الزواج

الخلاني ارفع الموضوع دا كنت بحضر في برنامج افراح افراح في النيل الازرق ورغم انو الموضوع دا نزل قبل 4 سنوات تقريبا وانا كنت من اشد المستغربين للبحيصل دا لكن اسي سبحان الله اسي بقت الحكاية عاااااااااااااااااااااادي زي اكل الزبادي وتفنين وحاجات عجيبة بقت تحصل في زواجتنا .

الله يهدينا بس .

كل جيل اكعب من القبلو