السلام عليكم
مشتاقة ليكم شديد بس الجامعة ماخدة زمني كلو

ليه نحنا في عيون الناس الكبار جيل فاشل وغير هادف وما عندو موضوع؟

وليه هم فاكرين إنهم أحسن مننا؟
هم بالجد أحسن مننا؟؟

إنت شايف شنو؟
أنا شايفة حاجات كتييرة بس مستنية أرائكم

موضوع جمييييل ... نحييك ونجيك بي رواقة


بس مبدئيا مافى حاجة اسمها جيل فاشل .. ممكن فى مجموعة فاشلة ولكن ليس جيل باكمله فاشل

هلا وااااو ..


زى ما قلت ليــك .. مافى حاجة اسمها جيل فاشل .. وان وجد .. فاللوم يقع على الجيل اللى قام بتنشئته

وللأسف ..قديما ..قبلا يعنى كان كل جيل يتفوق على الجيل الذي يسبقه فكريا وعملياً وأخلاقياً حتى .. بس في

الاونة الاخيرة .. كان فى زى تردى فى التنشئة والتعليم ..مع سبق الاصرار والترصد .. تلقي الحكومات تبدل

فى المناهج باخرى اضعف ..لماذا؟ حتى التربويون بقوا يطبقوا في نظريات من شأنها إضعاف النفوس والهمة

و تتخذ كل السياسات للإضعاف من الاجيال القادمة فى كل المجالات !! خاصة الفكرى ..لانه اسرع طريقه لهدم

المجتمع .. الهجوم عليه فكرياً والحكاية ماشة ممرحلة .. عشان كدة حاليا كل جيل لما يشوف اللى بعده بيصفه

بالفشل .. ناسي انه كان احد ادوات الفشل ده ومسؤول عنه تماماً

ماعارفة مثلا هل حضارة الانسان على الارض وصلت أوجها .. والان فى حالة التراجع حتى الزوال ..أم ماذا؟؟

تشكري ي فولة على الإضافة الراقية

شوفي
أنا مقتنعة تماماً إنو نحنا جيل متميز شديد عن الأجيال الفاتت
ودة بسبب الثقافات والتجارب والمعرفة المتوفرة لينا
عندنا وسائل نقل معلومات سريعة جداً
عندنا وسائل تعليم مريحة
وعندنا ذكاء الكل بيشهد إنو نسبته أكتر في جيلنا من الأجيال السابقة

ولما تجي تعملي مقارنة بسيطة تانية
بتلقي إنو كمية المعلومات الفي راسي أسي وأنا عمري 19
أكبر من كمية المعلومات الكان بيعرفا أبوي لما كان عمره 19 سنة

برضو لبسنا وأغانينا البنسمعا وحتى طريقة كلامنا وتعاملنا مع بعض
هم ما قادرين يتقبلو إنو الزمن بيتغير
والمفاهيم بتتطور

أنا شايفة إنو المشكلة فيهم هم ما فينا
وهم زي ما لبسو الشارليك هومز والفساتين القصيرة وسمعو أغاني الجاز الكانت جديدة ومستنكرة الزمن داك
نحنا من حقنا نلبس سكيني جينز ونسمع لعمرو دياب من غير ما يشككو في خشونة صوتو

وراجعة ليكم

بصراحة وبي بلاغة شديدة لمن تكون النسبة الفاشلة نسبة كبيرة جدا فبكل بساطة فعلا جيل فاشل .

لييه أنا حاسة إنو الموضوع ما جذب الناس

لا

تسلم يا ود ابرق ع المرور الأنيق
ويا ريت ترجع تاني ونواصل

بأكد على كلامك دة
وأنا شايفة إنو أي مقارنة لي جيلنا بالأجيال السابقة غلط
وحتى لو قارنا لازم نحدد معيار واحد

مثلاً الناس بتحتج على قصة الحب والعلاقات قبل الزواج وقصص التعارف الطويلة العريضة
وناسيين إنو دي ضرورة (ما الحب في حد ذاتو)
بس الإنسجام والتفاهم
الناس زمان كان بتتزوج بالتراضي والناس كانت بتعرف بعضها
عشان كدة ما بيقعدو يحبو ويخطبو

بس أسي الناس كترت والجرائم كترت والقلوب وسخت

ولنا عودة

بسم الله الرحمن الرحيم

السلام عليكم ورحمة واو والصديق العزيز ود أبرق والجميع

لكي نجيب على هذا السؤال يجب أن نرد على: ما هو النجاح الذي حققه جيلنا الحالي ؟

سلام على الجميع واول مشاركه لي بعد غياب سنه ...... المهم

انا متفق تماما مع ود ابرق و واو ... يعني الليله الاهل بيحكو لي اولادهم عن اسلوب قرايتهم وتعبهم ده في مجال الدراسه مثلا ... انهم كانو يفتشو المعلومه ويحبثوا في المراجع ويبحتوا في الكتب عشان يلقو المعلومه المطلوبه منهم ..العمليه دي ليها جانب سلبي وجانب ايجابي:

الجانب الايجابي: حيطورو حبهم للعلم وكيفية البحث عن المعلومه لغايه ما يلقاها ولو امكن يزيد في معلومات من خلال قرايه المرجع والكتاب اللي عندو.. ويعرف وين يفتش وكيفية البحث وغيرها ....
الجانب السلبي: الواحد فيهم بكونو مضيع اكتر من ساعتين او ثلاثه في معلومه وحده بس والمفروض اصلا الدكتور او الاستاذ هو اللي يديها ليهو كجزء من مسؤوليتو كمعلم وبكده الطالب بكون فاز بمعلومه وحده وضيع معلومتين او ثلاثه في الامتحان ..

ده مجرد مثال بسيط لاسلوب التعليم للجيل السابق اما في جيلنا احنا فبنركز بس على الحاجه البقولها لينا الدكتور في الجامعه او الاستاذ في المدرسه وعليها بتدخل الامتحان وانا في نظري اسلوب جيلنا السابق اللي كانو بتعلمو بيهو مضر اكتر من انو نافع ليهم

ولي عوده ان شاء الله . . . . .