1- س: يا ولدي! قالوا اتخرجت.. أها شغال وين؟!..ج: والله يا حاج زي ما عارف.. اتأخرنا في الجامعة شويا.. وبعد داك اشتغلنا الخدمة.. طبعا الخدمة بتاخد وكت.. المهم إنّو اشتغلنا الخدمة واستلمنا الـ (خلو طرف).. وبعد داك سكّينا لجنة الاختيار، والشركات، والمدارس، والمحليات.. ومرة كده اشتغلت في شركة صغيرة متعاون ساي.. لكن ما في عوجة.. وزي ما عارف الحكومة قالت عندها لينا وظائف في السنة الجديدة.. لأننا ما حصلنا وظائف السنة الفاتت..
* الإجابة النموذجية: ما شغّال (عاطل)!!..
2- س: يا ود اخوي! قالوا اشتغلت.. بتصرفوا كم؟!.ج: والله مرتباتنا يعني.. وانت زي ما عارف إنّو المرتبات كلها زي بعض.. يعني ما في حد أحسن من حد.. لكن بعد كل فترة بيصرفو لينا حوافز، وحاجات صغيرة كدا.. وفي رمضان والأعياد برضو بنصرف حاجة كويسه.. على العموم مرتباتنا ما بطّالة.. أخير من العطالة!!.
* الإجابة النموذجية: 240 ألف!!..
3- س: يا أستاذ! عربيتك شنو؟!.ج: طبعا الواحد ما بيحب إنّو تكون عندو عربية واحدة!!.. الواحد فينا لازم يجرّب العربات الكورية، والصينية، واليابانية.. لكنكم بعد ما تكبرو يا أولاد بتكون العربات السودانية أحسن من أي عربات!!.. أنا في الوقت الحاضر ما مهتم بموضوع العربية، لأنّو المواصلات متوفرة!!..
* الإجابة النموذجية: ما عندي عربية!!.
4- س: بالمناسبة دي.. أولادك هنا ولاّ في البلد؟!.ج: مسألة الأولاد دي عايزة ترتيبات معينة!!.. وأنا أصلاً ما مقتنع بحكاية البلد دي والبلد ديك.. يعني الواحد ما بيقدر يخليّ أولادو في البلد، وما بيقدر يسكنهم في الخرطوم.. عشان كدا الواحد قرر إنّو يرجع البلد؛ عشان يقدر يتأهّل!!.
* الإجابة النموذجية: ما متزوّج!!.
5- س: أخوك اتخرّج بامتياز.. انت اتخرّجت بي شنو؟!.ج: التقدير ما مهم.. لأنّو أصلاً ما في شغل.. عندنا أصحاب كُتار اتخرّجوا بامتياز وما لقو ليهم شغله!!.. أهم شي الواسطة مش التقدير!!.
* الإجابة النموذجية: تقديري (مقبول)!!.
6- س: يا أبوي! عايز تجيب لي العجلة متين؟!.ج: الأيام دي مشغول شويه.. لكن ما ناسيك.. وبعدين ما عايز أجيب ليك عجلة بس.. عايز أجيب ليك عجلة وكومبيوتر ومكتبة.. ولو عندك أيّ طلبات تانية برضو خلّيها جاهزة!!.
* الإجابة النموذجية: ما عندي قروش!!.
7- س: ضارب لَيْ من موبايلك؟!.ج: ياخي الموبايل دا حكاية مزعجة بشكل ما عادي.. الموبايل دا عبارة عن جاسوس.. ما مقتنع بيهو خالص.. وبعدين مراكز الاتصال بقت كتيرة (ومخفّضة).. فما في داعي للموبايل!!.
* الإجابة النموذجية: ما عندي موبايل!!.
8- س: يا ولد عندك كرّاس انجليزي؟!.ج: انت عارف يا أبوي.. أنا أصلاً ما عندي مشكلة في الإنقليزي.. عايزك تراجع معاي علوم تجارية، وإنتاج زراعي، وأسرية.. وبعدين أستاذ الإنجليزي ما مقصّر!!.. مهتم بصورة ما عادية.. لدرجة انّو بيشيل الكرّاسات معاهو!!.
* الإجابة النموذجية: ما عندي كرّاس انجليزي!!.
سؤال مُلتوي، وإجابة مُحرجة!!- صفر، تسعة، واحد، ... .. ألو.. كيف الحال؟!.. طبعا الأيام دي مفروض أدفع القسط التاني!!.. وزي ما عارف مرتباتنا اتأخرت!!.. وناس الجامعة ما بيجاملو في المواضيع (المالية)!!.. أوضاعك كيف؟!.. ألو.. إنت معاي؟!
- أيوه معاك!!.. لكن صوتك ما واضح!!.. أضرب لي المسا.. مع السلامة..
* في المسا: صفر.. تسعة.. واحد، ..
(عفوا هذا المشترك لا يمكن الوصول إليه حاليا)!!..
صفر.. تسعة.. اثنين، ...
(إن الرقم المطلوب غير متوفر حاليا)!!..
ودمتم سالمين
مع تحياتي (( وردتكم..~