عندما يكون القصر هو السببالي اليوم بتذكر اليوم داك
لاقاني اخوي قاعد العب بره مع الشفع الواطة صباح معاي ود عمتي
كورك لي المسلمي تعال جيتو دخلني البيت قال لي امي خلي الجنا دا يشطف الليلة مودينو المدرسة
جابو لي الطشت وقعدت اتشطف طلعت الغبشة ديك كلها وجابو لي قميس وبنطلون جداد حقات العيد
حدهن صباح العيد بعداك تملصن وتلمهن تاني الي تكون في مناسبه ولا جايبنك بيهن عيان لي الخرطوم
اها الوالده جابتن لي لبسوني ليهن بقيت اعاين في روحي واضحك الليلة موديني المدرسة
طبعا فرحان فرحة قايل المدرسة دي حاجة سمحة اخوي مسكني من يدي وكراني معاهو وهو مشاي
انا بقيت ماشي معاهو جكة وصلنا بيت عمتي قال ليها وينو الولد دا جهزتو انوديهن المدرسة الاتنين
طلعنا معاهو نمشي ونطحك اي واحد يعاين لي التاني عارفنهن ديل هدوم العيد بس مستغربين الشكل
وصلنا المدرسة اخوي وقفنا مع ناس اولي الجداد وهو مشي وقف مع ناس فصلو في الطابور
بعد ما صرفو الطابور جانا الاستاذ عشان يختار ناس اولي الجداد يا الليلة بذكرو استاذ طويل ورقييييييييييييق
وشعرو كتيييييييييييير وصاري وشو اتقول داير يقرينا بي المجان
اها الاستاذ بدي يسال فينا عمرك كم كده كدي سنونك التقول داير يشترينا ,, المس اضانك التانية بي يدك البي جاي
جيت المس اضاني لقيت اليد مقصة اديت الرقبة تنية شوية كده ومسكتها متكيف اني عملت الحركة القالها الاستاذ
بعد شوية القي ليك الاستاذ فرز ليك الجماعة واحدين بي جاي واحدين بي جاي قال ديل قبلناهم وديل يجونا السنه الجاية
انا ود عمتي لقينا نفسنا مع الناس الما قبلوهن اخير ود عمتي عارف عمرو صغير بس انا الوقت داك عمري بدخلني المدرسة
مشيت لي الاستاذ قلت ليهو انا مالي ما قبلوني قال لي لانك جاي بي قميص وبنطلون والقراية بي جلابية
قال جلابية قال بالله
قال لينا خلاص انتو تمشو تغيرو هدومكم دي وتلبسو جلابية وتجو
ما صدقنا طبعا جيت جاري البيت جري غيرت الهدوم ديك ولميتا تاني ولبست الجلابية وبقيت راجع علي المدرسة
اها في الطريق لاقاني اخوي فكوهن لي الفطور قال لي ماشي وين قلت ليه ماشي المدرسة الاستاذ قال لي امش
البس جلابية وتعال
قعد يضحك علي وانا مافاهم اي حاجة
قال لي الاستاذ قال لي اخوك دا لسه قصيييييييييييير خليهو يجينا السنه الجاية
ت:-
تجيك ام كلعلع والله انا من شفت خلقتو قلت الزول دا بضيع علي السنة