نرجع لي باقي الرحلة بعد ما ركبنا القطر ونزلنا لقينا باقي الجماعة منتظرننا تحت ودايرين يموتو من الضحك
واحد قال لينا ارح نمشي نجرب الساقية دي زمان كانت سمحة وهواها بارد والعجب لما تعاين لي البحر من فوق
وانوار الخرطوم حاجة روعة انا قلت ليهو والله الساقية دي زمان اكانت بتجري جري شديد لكن هسي بقت زي الحمار الدبساوي
يا الله تمش وهي زاتا ما بنفع نركبها عزابه كده دي دايرا ليها جكسوية وحنك جامد
في النهاية اتفقنا نركبها قلنا ما خسرانين حاجة نحن جينا الليلة نركب اي حاجة ما ركبناها في الرحلة المدرسية ديك
ركبنا فيها وبدت تتحرك وحات الله ذكرتني حمارنا داك ياهو زاتو تمش يا الله انا قلت احتمال دي لسة البروفة وهسي بتجر بينا
وقت اخت اللفة الاولي والتانية اتعودنا عليها وقعدنا نكورك ونصفق برا شغله ساكت
بس منظر الخرطوم بي الليل حاجة روعة والعجب البحر لما تعاين ليهم وانت فوق ليك مراد ما تنزل كلو كلو حقيقة جو ينعس
وقعدنا نكورك في الزول البشغل فيها يا اخينا زيد السرعة شوية قبال ننوم طبعا زمان اكان سرعتها اكتر من كده
والعجب لما تكون انت فوق وتجي مدوره بي العكس ليك تحس بي روحك زي المتينك حقنه ولا شنو كده ما عارف
المهم تحس بي روحك زي الفي شي بجبد فيك لي تحت ونفسك قايم لي فوق بس ما زي القطر حاجة مخدره كده ولزيزه
اها وقت خلاص دايرين ينزلو الناس طبعا كلو لفة بنزلو ناس بي التوازن عشان ما تقع اول ناس نزلونا نحن عشان كنا مشاغبين
وقاعدين نكورك ونحن نسوي ليهو كدي اخد ليك لفة وتعال نحن بننزل
ابقي كلو كلو يتحرك الا ننزل وجانا بتاع الحرس قال لينا الا تنزلو قلنا ليهو نحن ما اول ناس ركبنا عشان ننزل اول ناس
ود الذينا ابا كلو كلو يسمع كلامنا والناس المنتظرين الناس تنزل عشان يركبو يشيلو ويحمرو لينا
المهم نزلنا بعد عدة جولات من المناقشات وقلنا ليهم اها ان شاءالله تطير بيكم في السماء
غايتو الداير يركب الساقية اكان ما معاهو الجكس بتاعو ما يركب ويتعب روحو ساكت بي النعاس