كيك عااااادي

lost soul · **مرسل:** الخميس نوفمبر 27, 2008 2:52 pm

طبعا بعد عمر طويل وفشل كثير وهبوط في الفرن فظيع ويا سكر زايد ويا في ريحة بيض يا الباكينق باورد زايد اخيييييييرا

الواحد عرف ليهو طريقة كيك للشاي ريح راسو وطعم حلووو

غايتو بعد جهد جهيد حتى زبطا المقادير دي :05

بسم الله

3 بيضات كبار / لو صغار 4

3 ملاعق كبيرة زيت نباتي

2 ملاعق كبير باكينقباودر ما مليانات فل وعاملات جبال فوقم يعني ممسوحات

ملعقة صغير فانيليا لو سائلة ملعقة صغيرة مكيلة ومليانة فل لو باودر

كبايتين دقيق أبيضض رقم واحد ( السر في الكباية زاتا شفتو الكباية بتاعت شاي لبتون !! بس هي زاتا :05

)

كباية ونص سكر لو بتحبو السكر ولو لا كباية وحدة ( نفس كباية لبتون )

والسر في الطعم الحقيقي

كباية حليب ( ما تستخدموا الحليب السائل الجاهز دا استخدمو حليب البودرة وزوبوه / اربعة معالق حليب بودرة في
كباية لبتون زاتا ) اهما شئ انو يكون حليب بودرة

يلا طريقة خلط المكونات دي

دياما ولاي عجنة

بتنخل الدقيق ( يعني تغربلوا بالغربال عشاان يتفكفك شديد )

تضيف الباكينغ باودر للدقيق وتخلطو تسو
و المهم الباكينغ باودر يتوزع في الدقيق وتخليهم على جنب

تجيب البيض وتكسرو

بيد وحدة يا شيف علووش

وتضيف ليهو الفانيليا والسكر وتضربو بيدك بمضرب شوية بس بعدين تضيف للسكر والفانيليا الحليب بيديك خليط ساائل

بعد دا تجي تضيف الدقيق للخليط السائل ( تضيف دقيق شوية وتحرك وتاني شوية دقيق وتحرك ) وما تخافوا لا بيكرضم ولا شئ

بالنسبة لقوام الخليط بعد ما الدقيق يخلص او ممكن قبلي ما يخلص ما يكون سائل موية ولا جامد كتير لدرجة ما تقدر تحركو بيدك وسط يعني

الخبز

تجيب الصينية العايز تخلط فيها وحتى لو ما بتمسك واحد من اتنين

يا تمسحا بطبقة صغيرة وخفيفة من الطحينة او تمسحا بزيت وتخت دقيق في الغربال وتبدا تغربلوا فيها لحدي برضو ما يعمل طبقة خفيفة ( طبعا حسب الموجود )

الفرن لازم يكون ساااااخن

لكن ما شديييييييييييييييييييييييييييد لانو لو شديد حتحمر ببفقوق اول حيحصل شئ اسألوني انا جربتو

وتختها في الفرن لمدة 20 دقيقة في درجة حرار 180 وما تفتحا خلال الزمن دا نهائيا لانو ضمان ما بتكون نجضت او شئ وما تختها طوااالي فوق النار خليها في نص الفرن

بعد ال 20 دقيقة خت النار في 220 واديها 10 دقايق بعد داك اكيد حتشمو ريحتا

كيف تعرفا نجضت

اول شئ الريحة بتكون واضحة

تاني شئ

سكين تدخلوها في الكيكة لو طلعت نضيفة معناه نجضت لو لا معناه لسى

بس الاهم ما تفتحوها كتير

وبالهنا والشفا

والعندو افكار علينا جااي :wink:

خلاااص تعبتا يااخ

dafinshi · **مرسل:** الخميس نوفمبر 27, 2008 3:02 pm

يا لوست و الله ما قصرتي و مشكورة علي المجهود المقدر ده بس أنا ما بحب الكيك

فلو سمحتي تسوي لينا بسبوسة كده فاهمة, عشان الواحد يفطر بيها الصباح مع كباية شاي تقيلة يشيلوها نفرين :lol:

بنت النور · **مرسل:** الخميس نوفمبر 27, 2008 5:57 pm

حجربا

تسلم الايادي

lost soul · **مرسل:** السبت نوفمبر 29, 2008 11:13 am

دافنشي كوووووووود يا حليلك تلاقيك مساويك ما بتحب الكيك يااخ

خلاص ولا يهمك نشووف ليك بسبوووسة كااااااااااااااااربة

المشكلة انا البسبوسة دي ما بحبها لانها بتكون دسمة لكن ولا يهمك

بنت النوووووووووووووووووووووور خيتووو

الله يخليك جربي ورسلي لي حتة وايرلس

mind zero · **مرسل:** السبت ديسمبر 27, 2008 3:59 pm

عارفة يا لوست

كدي دقيقة قبل اي شي انا والله و من هذا المنبر انحني ليك تقديراً لحرفنتك في المطبخ
عارفة اللي بيشتغلوا في المطبخ و يعملوا الحاجات و تطلع ناجحة دا شي
و اللي عندهم ال tips and tricks ووصفهم دقيق كدا زيك شي تاني
ما شاء الله شكلك شيف طراز اول

انا جيت بس في البوست دا عشان احكي ليك ليه انا (معقدة) من الكيك

زمااااااان صغيرة شديد اظن 14 - 15 سنة كدا لقيت ماما و بابا طالعين مشوار طويل و انا وقعت في يدي وصفة كيك
بس بقيت ما قادرة اصبر لحد ما يطلعوا عشان امشي اجرب البتاعة دي و كان الوصف تفصييييييييييلي زي وصفك دا و بينفع شديد للمبتدئين
المهم يا ستي اول شي المقادير واضحة و ما ناس جرام و ليتر ديك و بقى لي الموضوع دا ساااااهل و اتكيفت جدا جدا

يلا تعالي شوفي عشان تستوي
أول شي ما كاتبين انه لازم تمسح قالب الكيك باي شي و انا خام شديد اعرف من وين انه بيلصق ؟؟
تاني شي يلا فيه زي وصفك دا انه بعد كم من الزمن تقوم تشغل النار الفوق عشان تستوي و تحمر شوية من فوق

عارفة انا عملت شنو ؟
رفعت رف الفرن في اعلى مكان و (حشرت) القالب و شغلت الفرن
بعدين الريحة بقت قوية و انا ما قادرة اصبر لحد ما الزمن القالوه يجي لكن قلت بس الليلة لازم (التزم)
عارفة لما جيت المطبخ لقيت الفرن (منور) شديييييد
بعد كدا طفيت النار لقيته لسة مولع ! ياخي دي مالا و اتأكد و اتأكد
آخر شي فتحت الفرن لقيت الكيك نفسه هو اللي (بيشتعل) :shh:

ختيته فوق شديد و من السخونة علي و مسك في النار و ولع

انا سمعت بالاكل بيحرق
لكن يولع دي والله كتيرة
عشان كدا انا شايفة انه لي كل الحق اتعقد من الكيك

lost soul · **مرسل:** الأحد ديسمبر 28, 2008 3:04 pm

مايند

اول شئ تسلمي يا عسل يااخ كلامك رفع لي معنوياااتي والله هههههههه بس ناقصنا العرس خخخخخ

وتاني شئ

والله متا من الضحك بجد في انو الاكل يتحرق لكن يولع ههههههههههههه صحي دا شكلو اشتعل اشتعال ذاتي

شفتي انا كان عندي عقدة من الكيك لانو يا ما قامت الكيكة يا سكر زيادة يا من جوة ملبكة يا ناشفة غايت انسي تعبتا لحدي قبلي سنة بس ظبطت اتخيلي

الكيك بتاع الجاتو سااهل ومعرووف

لكن العادي بتاع الشاي وكدا صعب يااخ موضوع وسل رووح
لكن غايتو لا حياة مع اليأس ولا يأس مع الحياة ابدا ابدا ابدااااااا

المستبده · **مرسل:** السبت يوليو 11, 2009 11:33 pm

هع هع انا جربتا الليلة

ومعاها شاي مقنن

بس ما عملتو انا :lol:

لكن طلعت مزبوطة :wink:

رغم انها قررربت تحرق :05

وصورتها ليكم....

بس كسلت انزل الصور :mrgreen:

تسلمي يا لوست نفعتني غايتو :wink:

تسجيل الدخول

كيك عااااادي

الموجودون الآن