ازيييييكم يا بنااااات.. مشتاقوووون كتيرااات

جاتني فكرة (الهمتني) ليها قروبات الفيس بوك العجيبة الطالعة الايام دي.. وهو منو العندو زمن لقروبات الفيس بوك ولا شنو..

يلا نشارك بعض معلومات مفيدة

يعني نعمل موضوع واااحد بدل الزول افتش لكل حاجة براها ونضمن فيهو كل المعلومات البتخص العروس والعرس
ابتدا من الصالات واشكالها وبتشيل كم .. الخ
الحنانات الكويسات وتلفوناتهم
الكوفيرات ومكياج العروس
الفنانات وبرنامج حنة العروس والرقيص الخ
اسامي ومواقع وتلفونات محلات التياب والدهب والجدلات في الخرطوم ومحلات الورود وتزيين الصالات وعربية العرسان ومحلات الكيك الخ

يلا ورونا عروض نظيفة بالله

انااااااااااااااااا بي زات نفسي

من برنامج حنة العروس والفنانات والدلوكة والرقيص

واصلو كديسة العرس حايمة حايمة حايمة الايام دي .. وانتي تميتي الناقصة

الموضوع دخل الحوش يا دموووره بقيتي تفتشي من هسي موووووش

لو اقدر اساعدك من عيوني والله لكن نشوف اخواتنا الفي السودان لو يفتونا ............................كلنا محتاجينوا

سلام،
ان شاء الله ربنا يتتمموا بالخير لكل من على اعتاب القفص الذهبي
ويرزق البقية الزوج الصالح والذرية الصالحة

الموضوع جميل ومفيد
انا غايتو ممكن افيدكم بالنصيحة
يعني لو واحدة محتاجه لإستشارة
يعني محتارة بين توبين ولا شكل مكياج والا حنة
(ممكن تخت صور)
ممكن تطلب النصيحة ونحنا حاضرين.

أختي هند حمدتو وغادة شرفي وهلم جرا
ومافي داعي لجلبطة الوش بي حلة الميك اب
الطبيعي كويس ومضمون






ت:
انا الجابني هنا نشو

بسم الله الرحمن الرحيم ....
نبدأ ملف العروسة










شباب .....
لو سمحتو بعد دا الكلام دخل الحوش
العروسات ديل محبوسات
البشوف ضلو ساكت بجاي
ما يلوم الا نفسه

قبل ثلاثة شهور ....

الفستان ...
لازم تبداي تفكري في الفستان (الهم الأكبر)
اكيد طبعاً كل واحدة فينا من هي ضغيرة
بتتخيل في شكل الفستان بتاعها وبيكون عندها تصور هو حيكون كيف
يبقى بس التنفيذ ... ولفة المحلات علشان تشوف الأنسب
الانترنت سهل الأمور كتير جداً .... اعملي سيرش براحتك
بس لازمي تكوني خاته في بالك تصور معين علشان ما تتوهي في عالم النترنت الواسع
عموماً ... القاعدة الذهبية هي اختاري البناسب جسمك ما البعجبك
يعني لو كنت مكلبظة ... ابعدي عن المنفوش ..
لو اكتافك عريضة .. الفتحة تكون من الظهر ما من الأكتاف ... وهكذا
النصيحة الذهبية التانية ...
اختاري دائماً حاجة كلاسيك .. يعني ابعدي عن التقليعات والموضات الغريبة
واتذكري دائماً ان الكلاسيك ابداً ما بيقدم مع الزمن
يعني بعد كم سنة لو شفت صور عرسك او شافها زول تاني ما يقول في نفسه
دي كانت شاعرة بشنو والا ماله عاملة في روحها كدا
يعني مثلاً موضة الفستان القصير أو الداخلة فيهو اللوان (احمر أو اسود)
يمكن كانت حلوة في وقتها بس بعد كم سنة ... اتخيلوا الوضع

المهم لو خلصت من موضوع الفستان دا ... نص همك راح
نصيحة اخيرة ... ما تخليهوا للحظات الأخيرة
حتندمي طول عمرك ...

سلام،
العزيزة ريما
الف الف مبروك وربنا يتمم على خير ويكفيكم شر العوارض

ورينا باقي ليك كم كدا علشان نبدأ التخطيط معاك لو حابة يعني

بالنسبة للفستان
لو محجبة... الخيارات شوية محدودة لكن قبل فترة شفت لي صور تجنن
لو قيتهم تاني بنزلهم ليك
لو عايزة رأي (من غير زعل يعني) حكاية الجاكت دي ما حبيتها خالص
بتضيع فكرة الفستان بالذات لو كنتي محجبة (بيعمل جوطة مع الحجاب)
احسن تركزي على الطرحة وإكسسوار الرأس (زي التاج)
خلينا نفتش شوية يمكن نلقى حاجة انسب.

لو ما محجبة ما عندك مشكلة الخيارات كثيرة جداً.


اتحبستي والا لسة؟
لو محتاجة تعملي رجيم اديني خبر عندي رجيم هايل وسريع.

المهم لو احتجتي أي مساعدة ادينا خبر ونحن في الخدمة.


بنات لو شايفين ان البوست دي مفيد
ادونا خبر علشان نكمل فيهو.
ما حأقبل أقل من عشرة اصوات
اذر وايس ...
العفو والعافية



ت: انا نازلة السودان بعد كم يوم
اشوفكم بعد شهر (ما اظن يكون عندي وقت ادخل النت)
نشوفكم على خير.

سلام،

موضوع الرجيم مهم جداً
بس لازم يكون مدروس
يعني لو الواحدة عايزة تنزل 10 كيلو
تعمل حسابها انها تنزل 5 كيلو بس
الخمس كيلو الباقيات بينزلوا براهم
ولازم موضوع الرجيم دا يبدأ قبل فترة طويلة
يعني 3-4 شهور
علشان الواحدة شكلها يكون healthy في الزواج
ودي هي القاعدة الذهبية الاولي في الرجيم
لازم تشربي عصاير fresh كثير قبل الزواج باسبوع (قاعدة 2)
(طبعاً تجنبي السكر الكثير) دا بيخلي البشرة نضرة وصحية.


اشوفكم بخير

ريما

ان شاء الله نفرح بيك وبكل الصبايا في القريب العاجل

اوكسجين حبيبة يا ريت تدعمينا بالصور كلامك مفيد

اماااا بالنسبة لي ريما فهي كلها على بعضها .. طووووول بعرض ما تامة عشرة كيلو

تمشي وتجي بالسلامة يا رب وفي انتظارك